لما تبص حواليك وتلاقي مافيش مظاهرات ولا احتجاجات ولا حتي اعتراضات علي اي شئ في البلد يبقي اطمن رجعت مصر لكامل استقرارها …… لما السمك يزغلل عنيك والفراخ تنفش ريشها بعد اللي جري للمواشي من حمي قلاعية ..لكن السمك والفروج للفرجة بسبب دلال الاسعار يبقي اطمن خالص انت في كامل الاستقرار ….
لما تكتشف ان تكلفة محاكمة مبارك المخلوع عدت ال 9 مليار وانت في عرض تعريفة وياريت بفايدة يبقي انت روق كدة لانك تنعم بالاستقرار ..
ولما مبارك يتغني بالشعر والعادلي يتلو القرآن والديب بينفخ في السيجار وجمال وعلاء من غير قيود يبقي عايز ايه تاني ما هو دا الاستقرار ..
لما كل مواعيد الدنيا في مصر بقت مؤجلة لشهر يونيو حتي اصبح الجميع يدعوا ( اللهم بلغنا شهر ستة ) يبقي انت في كامل النظام والاستقرار …
لما تشوف اليهود بقي عندهم فائض في الغاز المصري الرخيص وحتي بقوا بيصدروه بالغالي وانت عمال تلف كعب داير علشان انبوبة بأي ثمن ومش لاقي .. يعني اسرائيل منورة بفلوسنا ومصر منورة بأهلها يبقي انت في قمة الاستقرار ..
ولما فجأة افلام ادانة المتهمين بقتل الثوار تتلف ولما ملف قضية موقعة الجمل يخبيه العفريت ولما تلاقي المتهمين بقتل اولادك واخواتك الثوار بيخرجوا براءة (براءة الذئب من دم ابن يعقوب وابن يعقوب نفسه يبقي هو المتهم) يبقي لازم تتطمن خالص انت غرقان في الاستقرار …
لما المجلس الحنون يعترف بعد عذاب بفشل حكومة الجنزوري ويتبتل الي الله أن تسحب الثقة منها يبقي ظهر الاستقرار علي حقيقته ..
ولما كشف العذرية يطلع عادي وبتحصل يبقي استني واوعي تتكلم واطمن علي بناتك وبوس ايدك وش ودقن علي نعمة الاستقرار ..
ولما تلاقي تريلا بترمي البنزين والجاز في الصحراء ..اوعي تتكلم عن أي أزمة .. دا هو دا الاستقرار
ومبروك عليك الاستقرار
لا ده احنا مطمنين ع الاخر 🙂 😀