فيديو.. أمين شرطة يسحل شابا ويضربه بـ “الشلاليت والكفوف”

تناقل رواد شبكات التواصل الاجتماعي فيديو يُظهر أمين شرطة يعتدي بالضرب على شاب، وقال ناشر الفيديو إن الواقعة كانت على رصيف محطة مترو دار السلام في الثامنة من مساء الإثنين الماضي.

«عبدالعاطي»، ناشر الفيديو في قناته الي تحمل اسمه على «يوتيوب»، ذكر خلفيات الواقعة، موضحًا «كان فى مجموعة شباب بتعاكس خطيبة الشاب ده وراحت (الفتاة) تستنجد بعسكرى تأمين المحطة والعسكرى رفض يحميها ولما جه خطيبها كانوا الشباب مشيوا وراح يلوم العسكرى وحصلت ما بينهم مشادة ومسكوه فى بعض».

وأضاف عبدالعاطي: «باقى عساكر المحطة لما شافوه المنظر ده انهالوا على الشاب بالضرب ولما جه كبير عساكر المحطة عشان يراضى الشاب بعد ما الشاب ما صمم إنه يرفع بلاغ ضد العسكري راح جه أمين شرطة وبيسأل الشاب إيه الدوشة اللى انتا عاملها دى، راح الشاب حكى له الحكاية راح أمين الشرطة قاله انتا عاوز إيه دلوقتى، الشاب قاله أعمل محضر ضد العسكرى».

وقتها «أمين الشرطة قاله مفيش محاضر هتتعمل، الشاب قاله خلاص أنا مش همشى من المحطة غير لما حقى يجى، راح أمين الشرطة شتم الشاب بأمه وضربه بالقلم، قام الشاب زعق في أمين الشرطة وقاله ماتشمش أمى وبعدين انت بتمد أيدك عليا ليه، ده مش من حقك فشدوا مع بعض لحد ما وصل الأمر لكده.. وكل ده عشان الشاب عاوز حقه».