نركز مع بعض شوية عشان الموضوع مهم ... ومحتاج تعرفوه وتنشروه عشان ميحصلش بلاوي ... لأن الإعلام بتاعنا مركز مع الأخبار الهبله وسايب المصايب اللي ممكن تجيلنا .

مؤخرأ من 2007 إنتشر بصورة ملحوظة فيرس إسمه زيكا " zika virus " في الامريكتين . وتحديدا البرازيل وكولومبيا وبوليفيا .. بالبلدي كده عشان الأماكن دي المناخ فيها دافئ ومناسب لنمو البيض بتاع البعوضه اللي بتسبب المرض ده ... والسنه دي انتشر بسرعه جدا في البرازيل وبدأ ينتشر في الدول المجاورة .

تاني إنبهار معانا إننا " كمصر " لحد دلوقتي معندناش آليات عن ازاي نواجه الفيرس ده ومحدش إتكلم خالص عنه ... لولولولولولولولولولوووووووووي . زغرطي يااللي منتيش غرمانه .

تالت إنبهار معانا ان الفيرس ده إنه ملوش علاج أو مصل لحد دلوقتي .. إي والله ياأخي مفيش علاج لأننا مش عارفين معلومات كافيه عن المرض دهون .. أيوة دهون ... وده في حد ذاته كارثه ومنظمه الصحه العالمية شغاله إجتماعات كل يوم .. وبان كي مون لسه بيعرب عن قلقه " واضح إن دي شغلته في الحياة بس "

خطورة المرض ده في 3 حاجات :
1- إنه بيسبب خلل جيني في الأجنه .. وبالتالي الأطفال اللي هتتولد هتبقي راسها صغيره نتيجه عدم نمو الجمجمة .. وده هيأدي بالطبع إن الطفل ده هيبقي متأخر ذهنيا ووظيفياً عن بقية الأطفال .. الحاله دي عندنا في الطب إسمها microcephalus " شكل الطفل هتلاقيه في الصورة " بس الحمد لله حتي الأن لم تسجل أي ولاده مشوهه "
2- لو طفل إتصاب بيه هيأثر ع الجهاز المناعي والعصبي بتاعه وهيأدي للشلل .
3- إن أعراضه زي أعراض البرد العادي بالظبط .. يعني هتلاقي إرتفاع في درجه الحراره مع احمرار في العين .. بس المميز فيه إنك هتلاقي آلام في المفاصل وطفح جلدي " لو حسيت بالحالات دي إجري علي أقرب طوارئ مستشفي "

لموضوع مخيف جداا ومش سهل بالمناسبه .. يعني متاخدش الموضوع هزار ..
طيب والحل ؟
الحل إنك تاخد إحتياطاتك ب4 طرق سهله جدااااااا جدااااااااااااا .

1- الميه الراكدة ومتخزنه بقالها فتره أو اللي في جراكن ارميها وإملي الميه تاني عشان الفيرس بينتشر في المية الراكده .. وملهاش لزوم تخزن ميه دلوقتي .. إنت مش داخل علي سحب اللي هيخزن أكتر هيكسب آيفون 6 .

2- الزباله ارميها أول بأول ومتكومهاش عندك عشان برضه الفيرس بينتشر وبيتكاثر فيها .

3- ودي الأهم : متعملش نفسك هركليز ولما تيجي نموسه عليك تفعصها .. بالعكس .. حاول تبعد عنها بقدر المستطاع تبعد عنهم .. ويستحسن تستخدم مبيدات حشريه وتلبس بكم طويل عشان تمنع الحشرات اصلا انها تجيلك ... وأمن نفسك بإنك تقفل الشبابيك كويس في الفتره ده لأن محدش عارف ممكن يدخلك منين .

4- لو إنتي حامل وحسيتي إن عندك الأعراض اللي انا قلتها فوق دي حاولي تستشيري الدكتور علطول عشان تحمي إبنك من إنه يتولد مشوه .. لان الموضوع خطير فعلا وميستحملش الهزار .

وأخيراً ربنا يبعد عنا وعنكم جميع الأمراض ..